Artikkel
Bildet viser to karbunklar på seteregionen hos ein pasient som hadde vore på ferie i Vest-Afrika. Sentralt på karbunklane er det hol på 3 mm som leier ned til kanalar på 1–2 cm. Pasienten merka hevelsane på veg heim då dei vart ømme, kløande og byrja å sive. To dagar etter heimkomsten oppdaga ho gulkvite larver som kraup ut av såra (sjå video). Såra vart vaska og eksplorerte for fleire larver. Såra grodde og kløen vart betre utan infeksjonsutvikling.
Pasienten hadde klassisk furunkulær myiasis forårsaka av flugelarver av typen Cordylobia anthropophaga , ofte kalla mangofluge eller tumbu fly . Tumbu er den vanlegaste årsaka til human myiasis i Afrika (1) . Fluga legg egg i fuktig jordsmonn eller tøy (1–3) . Når menneskehud kjem i kontakt med egga, klekk larvane og kryp under huda. Dei utviklar seg i 8–12 dagar før dei forlèt verten og forpuppar seg. Larvene treng eit luftehol, som er synleg i hevelsen over larva.
Behandlinga er å få larva ut. Ein kan tette lufteholet med olje og vente til larva kjem ut for å få luft (kan ta eitt døgn) og så fjerne ho. Alternativt kan ein fjerne larva kirurgisk (1–3) . Tetanusvaksine er tilrådd.
I Noreg ser ein oftast fakultativ myiasis med andre flugelarveartar, som kan ete nekrotisk vev i vanskjøtta kroniske sår. Reinbrems (Hypoderma tarandi ) gir spesifikk myiasis hos reinsdyr, men har òg gitt fleire tilfelle av human myiasis i Finnmark (4) . Diagnosen er klinisk. Vil ein vite eksakt type fluge, kan ein sende larva på etanol til mikrobiologisk laboratorium for mikroskopi.
Pasienten har samtykt til at artikkelen blir publisert.
Artikkelen er fagfellevurdert.